Potensial xaridorlaringizni qanday yo`qotasiz? 9 ta sabab va xatolar

Mijozlaringizni eng ko’p uzoqlashtiradigan narsa haqida hech o’ylab ko’rganmisiz?

Ehtimol, siz yoki sizning xodimlaringiz nimanidir noto’g’ri qilayotganingiz va shuning oqibatida mijozlaringizni yo`qotayotganingiz haqida o’ylab ko’rdingizmi?

Ushbu maqolada biz sabablarni batafsilroq ko’rib chiqishga harakat qilamiz.

Maqolani yanada qiziqarli va foydali qilish uchun biz mijozlar fikrlarini, shuningdek, ushbu muammolarni hal qilish va mijozlar tajribasini yaxshilashga yordam beradigan o‘z maslahatlarimiz va amaliy ishlarimizni kiritdik.

1. Mijozni “o’qimaslik”.

Ikki xil xaridor bor: xarid qilishdan zavqlanadigan va taklif qilinayotgan barcha mahsulotlarni batafsil ko‘rib chiqishga vaqt ajratishga tayyor bo‘lganlar va ko‘p vaqt sarflamay, qidirayotgan narsasini tezda topmoqchi bo‘lganlar. Xaridning onlayn yoki do’konda amalga oshirilishi muhim emas, do’kon xodimlari har doim xaridorni to’g’ri tushuna olmasligi va uni qaysi turga tasniflashni hal qila olmasligi muammoga olib keladi.

Barcha mijozlaringiz uchun yagona yondashuv mavjud emas, shuning uchun siz va sizning xodimlaringiz mijozning xatti-harakatlarini kuzatish, tinglash va har biriga nima kerakligini bilish uchun vaqt ajratishingiz kerak. Aniqlang, ular shoshyaptimi yoki bo’sh vaqtlari bormi? Ular sotib olishga tayyormi yoki sotib olmaslikni afzal ko’radimi? Har bir mijozingiz uchun to’g’ri yondashuvni tanlash uchun ushbu savollarga javob bering.

2. Nosamimiy iltifotlar

Misol uchun, menga egnimdagi kiyim yarashib turmaganligi ko`rinib turgan bo`lsa ham, chiroyli turganini yolg`ondan aytishgani yoqmaydi. Mijozlarga soxta iltifotlar aytish ba’zan teskari natija berishi mumkin. Buning o’rniga, mijozlaringiz bilan rostgo`y bo’ling. Agar kiyim mos kelmasa, bu haqda unga rostini ayting va alternativ tavsiya eting – garchi sizning do’koningizda bu narsa yo`q bo’lsa ham. Bu ishonchni kuchaytiradi va mijozga siz uning pullarini olishga harakat qilmayotganingizni, balki ularga yordam berishni xohlayotganingizni ko’rsatadi. Agar ular mahsulotni boshqa joydan sotib olishsa ham, sizning halolligingiz esda qolishiga va ular kelajakda do’koningizga qaytib kelishiga ishonchingiz komil bo`lsin.

3. Ma`lumotga ega bo`lmagan xodimlar

Mahsulot haqida ma’lumotning yetishmasligi va nima sotayotganini bilmagan sotuvchiga berilgan savolga aniq javobning yo’qligi nafaqat mijozlar tajribasiga zarar yetkazishi, balki savdo va mijozlarning sodiqligiga ham salbiy ta’sir qilishi mumkin.

Shuning uchun xodimlaringiz uchun yuqori darajadagi o’qitishga sarmoya kiritish muhimdir. Eng yaxshi natijalarga erishish uchun xodimlaringiz darajasini oshirish uchun turli usullardan foydalaning.

Buning uchun siz ikki yoki undan ortiq xodimlarni tayyorlash usullaridan foydalanishingiz mumkin. Masalan, siz xodimlaringizga kompaniya siyosati haqida og’zaki aytib bering va keyin ma’lumotni tarqatma materiallar yoki videolar bilan mustahkamlang, shunda ular kerak bo’lganda o’z bilimlarini yangilashlari mumkin bo`ladi.

Yoki, agar siz xodimlaringizga inventarizatsiya dasturlari kabi tizimlardan qanday foydalanishni o’rgatayotgan bo’lsangiz, ushbu dasturlarni shaxsan ko’rsatib, keyinroq ularga qayta foydalanishlari mumkin bo’lgan o’quv videolarini yuborganingiz ma’qul.

4. Eng kerakli paytda joyida bo’lmagan sotuvchi-maslahatchilar

Siz do’koningizga xaridorlarni jalb qilish uchun ko’p harakat qildingiz. Biroq, agar mijozga xizmat ko’rsatadigan va sotib olishni taklif qiladigan hech kim bo’lmasa, barcha harakatlaringiz behuda ketishi mumkin. Smenani to’g’ri rejalashtirishga intiling va xodimlaringiz istalgan vaqtda mijozlarga xizmat ko’rsatishga tayyor bo’lishini ta’minlash uchun harakat qiling.

Shuni yodda tutingki, shunchaki xodimlarga ega bo’lish yetarli emas, xodimlaringiz mijozlarga yordam berishga qodir va tayyor ekanligiga ishonch hosil qilishingiz lozim. Bunday vaziyatda sizning vazifangiz o’z jamoangizga mijozlarga to’g’ri va o’z vaqtida xizmat ko’rsatish muhimligini tushuntirish va mijozlaringizning iste’mol tajribasidagi rolini ko’rsatishdir.

5. Do`kon vitrinalarining tartibsiz bo’lishi va tovarlarning noto’g’ri taqdim etilishi.

Do’kon va vitrinalardagi tartibsizliklarni hech qanaqasiga oqlashning iloji yo`q. Tartibni saqlang, shunda mijozlar sizni ko’proq hurmat qilishadi.

“Ichkaridagi narsa muhim” degan iborada qandaydir hikmat bordir, lekin chakana savdo dunyosida uning tashqi tomoni ham muhim. Do’koningiz va tovarlaringizning ko’rinishi savdoni oshiradi yoki to’xtatadi, shuning uchun do’koningiz har doim yaxshi ko’rinishda bo’lishiga ishonch hosil qiling.

 Chiroyli vitrinalar yarating va mahsulotingizni eng yaxshi tarzda namoyish qilish uchun yuqori sifatli yoritish va mebellarga mablag’ sarflang.

6. Kassadagi uzun navbatlar

 Kassadagi uzun navbatlar odamlarni uzoqlashtiradi. Tadqiqotlar shuni ko’rsatadiki, xaridorlar kassada o’rtacha sakkiz daqiqa kutishdan keyin xarid qilmasdan do’konni tark etishadi.

Uzoq navbatlardan qoching va ularni yo’q qiling. Bunga tezroq, ishlatish uchun qulayroq hisob-kitob dasturi yordamida erishishingiz mumkin. Bu sizning do’koningizdagi xaridorlar oqimini tezlashtirishi va xaridorlarning erkinroq harakatlanishiga yordam beradi.

7. Narx belgilari bilan bog’liq muammolar

Tovarlarda narx belgilarining yo’qligi va har safar ma’lumot olish uchun xodimlarga murojaat qilish zarurati.

Narxlar xaridorlarning xarid qilish qarorlarida muhim omil hisoblanadi, shuning uchun ular sizning do’koningizda to’g’ri narx ma’lumotlarini topa olmasalar, ular ketishlari va katta ehtimol bilan raqobatchilaringizga borishlari mumkin. Bu muammoni qanday hal qila olasiz? Oddiy – mahsulotlaringizni markalashda ehtiyot bo’ling. Muammoni darhol hal qilish uchun mahsulot va javonlarni yo’qolgan yoki noto’g’ri narx belgilari uchun muntazam tekshirib turing. Shuningdek, narx teglarida aksiyalar va chegirmalarni ko’rsatishni unutmang. Agar siz o’z do’koningizda narxlarni ko’rsatmasangiz (ko’pgina hashamatli do’konlarda mavjud amaliyot), xodimlaringiz narxlar haqida ma’lumot berishga tayyor ekanligiga ishonch hosil qiling. Mijozlar yordamga muhtoj bo’lganda, tezda xodimlaringizga murojaat qilishlari uchun, ularga mijozlarni kuzatib borishni o`rgating.

8. Mijoz bilan salomlashmaslik

Bu kichkina ish, lekin mijoz bilan salomlashish katta ahamiyatga ega. Ularning mavjudligini sezishingiz xaridorlarga o`zlarini qulayroq his qilishlariga yordam beradi, bu esa tashrif buyuruvchilarning qolish va xarid qilish imkoniyatlarini oshiradi.

9. Maslahatchi tomonidan taqdim etilgan keraksiz ma’lumotlar

 Sotuvchi sizga haqiqatan ham kerakli narsani sotish o’rniga, sizni umuman qiziqtirmaydigan ma’lumotni berganida. Bunday holat ko‘pincha xodimlarning sotilayotgan tovarlar to‘g‘risida yetarlicha ma’lumotga ega bo‘lmaganligi yoki xaridorning haqiqiy muammosi va talabini qondirish o‘rniga ma’lum toifadagi tovarlarni sotishni maqsad qilganligi bilan bog‘liq. Sotuvchilaringiz shunchaki mahsulot sotishga harakat qilmasliklariga, balki har doim mijozlarga yordam berishlariga ishonch hosil qiling. Aks holda, bu mijozni do’koningizga takror kelmasliklariga sabab bo`ladi.